উত্তৰ-পূব

মেঘালয়ত ১১ নৱেম্বৰৰ পৰা সোণালী জয়ন্তীৰ ‘হাণ্ড্ৰেড ড্ৰামছ ৱাংগালা’ উৎসৱ

১৪ নৱেম্বৰলৈ চাৰিদিনীয়া বৰ্ণাঢ্য কাৰ্যসূচী; অংশগ্ৰহণ কৰিব অসমৰ মুখ্যমন্ত্ৰী হিমন্ত বিশ্ব শৰ্মাই

অসম জাতিৰ খবৰ, পশ্চিম গাৰো পাহাৰ, ৯ নৱেম্বৰঃ

মেঘালয়ৰ গাৰো জনগোষ্ঠীৰ অন্যতম প্ৰধান সাংস্কৃতিক উৎসৱ ‘হাণ্ড্ৰেড ড্ৰামছ ৱাংগালা’ৰ ৫০সংখ্যক সংস্কৰণ অহা ১১ৰ পৰা ১৪ নৱেম্বৰলৈ চাৰিদিনীয়া কাৰ্যসূচীৰে অনুষ্ঠিত হ’ব। পশ্চিম গাৰো পাহাৰ জিলাৰ চিবাগ্ৰেৰ গাৰো হেৰিটেজ ভিলেজ, ৱাংগালা আ’দামত সোণালী জয়ন্তী উদযাপনৰ ব্যাপক প্ৰস্তুতি চলিছে।

শস্য চপোৱাৰ পাছত কৃষিৰ সমৃদ্ধিৰ বাবে মিছি ছালজং দেৱতাৰ প্ৰতি কৃতজ্ঞতা জ্ঞাপন কৰি গাৰো সমাজে এই উৎসৱ পালন কৰে। উৎসৱত জনগোষ্ঠীটোৰ পৰম্পৰাগত সংগীত, লোকনৃত্য, ৰীতি-নীতি, থলুৱা খেল-ধেমালি আৰু বিশেষ ‘থাউজেণ্ড ড্ৰামছ’ পৰিৱেশন কৰা হ’ব।

১১ নৱেম্বৰৰ উদ্বোধনী অনুষ্ঠানত মেঘালয়ৰ মুখ্যমন্ত্ৰী কনৰাড কে চাংমা মুখ্য অতিথি হিচাপে উপস্থিত থাকিব। অনুষ্ঠানত স্মৃতিগ্ৰন্থ ‘চিৰংডিক’ উন্মোচন, পৰম্পৰাগত প্ৰাৰ্থনা, সাংস্কৃতিক অনুষ্ঠান আৰু কাৰ্বি আংলং ৱাংগালা দলৰ বিশেষ নৃত্য পৰিৱেশন কৰা হ’ব। উৎসৱৰ সৈতে জড়িত অগ্ৰণী ব্যক্তি আৰু প্ৰাক্তন নেতাসকলকো সম্বৰ্ধনা জনোৱা হ’ব।

১২ নৱেম্বৰত অসমৰ মুখ্যমন্ত্ৰী হিমন্ত বিশ্ব শৰ্মাই উৎসৱত অংশগ্ৰহণ কৰিব। সেইদিনা ৰুগা নৃত্য, থাউজেণ্ড ড্ৰামছ পৰিৱেশন, ৰুগালা অনুষ্ঠান, নৃত্য প্ৰতিযোগিতা, থলুৱা খেল-ধেমালি আৰু বঁটা বিতৰণৰ কাৰ্যসূচী থাকিব।

১৩ নৱেম্বৰত মেঘালয়ৰ ৰাজ্যপাল চন্দ্ৰশেখৰ এইচ বিজয়শংকৰ মুখ্য অতিথি হিচাপে উপস্থিত থাকিব। সেইদিনা পৰম্পৰাগত ‘চাচাট ছোৱা’ অনুষ্ঠান, লোকগীত, কিডছ ৱাংগালা দলৰ পৰিৱেশন আৰু থাউজেণ্ড ড্ৰামছ বিশেষ আকৰ্ষণ হ’ব।

১৪ নৱেম্বৰৰ সামৰণি অনুষ্ঠানত কেন্দ্ৰীয় পৰ্যটন আৰু সংস্কৃতি মন্ত্ৰী গজেন্দ্ৰ সিং শেখাৱট মুখ্য অতিথি হিচাপে উপস্থিত থাকিব। দহটা দলৰ মাজত নৃত্য প্ৰতিযোগিতাৰ লগতে গিনিছ ৱৰ্ল্ড ৰেকৰ্ডছত স্থান লাভৰ বিশেষ প্ৰচেষ্টা চলোৱা হ’ব।

উল্লেখ্য যে, ‘শত ঢোলৰ উৎসৱ’ হিচাপে পৰিচিত ৱাংগালা গাৰো জনগোষ্ঠীৰ সাংস্কৃতিক আৰু আধ্যাত্মিক পৰিচয়ৰ এক গুৰুত্বপূৰ্ণ প্ৰতীক। সোণালী জয়ন্তীৰ এই বিশেষ আয়োজনৰ জৰিয়তে গাৰো সমাজৰ থলুৱা পৰম্পৰা আৰু সাংস্কৃতিক ঐতিহ্য দেশ-বিদেশৰ দৰ্শকৰ মাজত অধিক ব্যাপকভাৱে প্ৰচাৰ কৰাৰ লক্ষ্য লোৱা হৈছে।

উত্তৰ-পূব বিভাগৰ অধিক সংবাদ