উত্তৰ-পূব

মণিপুৰৰ কাঙপকপিত দুই কুকি-জো যুৱকৰ মৃতদেহ উদ্ধাৰক লৈ উত্তপ্ত পৰিস্থিতি

অপহৰণৰ চাৰিদিন পিছত উদ্ধাৰ পাউগিনলাল আৰু টিংগিনলুনৰ মৃতদেহ; প্ৰতিবাদত ৰাষ্ট্ৰীয় ঘাইপথ অৱৰোধ, নিৰাপত্তাৰক্ষীৰ কন্দুৱা গেছ নিক্ষেপ।

অসম জাতিৰ খবৰ, কাঙপকপি, ২ নৱেম্বৰঃ মণিপুৰৰ কাঙপকপি জিলাত অপহৃত দুই কুকি-জো যুৱকৰ মৃতদেহ উদ্ধাৰক কেন্দ্ৰ কৰি ব্যাপক প্ৰতিবাদৰ সৃষ্টি হৈছে। ১ নৱেম্বৰত মৃতদেহ উদ্ধাৰৰ পিছতে জিলাখনৰ বিভিন্ন স্থানত প্ৰতিবাদকাৰী আৰু নিৰাপত্তাৰক্ষীৰ মাজত উত্তেজনাপূৰ্ণ পৰিস্থিতিৰ সৃষ্টি হয়।

মৃত যুৱক দুজন হৈছে টাফৌ কুকি গাঁৱৰ বাসিন্দা পাউগিনলাল হাংছিং (২১) আৰু টিংগিনলুন চংলোই (২০)। যোৱা ২৮ অক্টোবৰৰ বিয়লি প্ৰায় ৫.৩০ বজাত মেৰেনমেই গাঁৱৰ সমীপৰ পৰা অস্ত্ৰধাৰী দুৰ্বৃত্তই তেওঁলোকক অপহৰণ কৰাৰ অভিযোগ উত্থাপন হৈছিল। দেওবাৰে পুৱা চলোৱা বৃহৎ যুটীয়া অনুসন্ধান অভিযানত দুয়োৰে মৃতদেহ উদ্ধাৰ কৰা হয়।

মণিপুৰ আৰক্ষীৰ তথ্য অনুসৰি, ৰাজ্যিক আৰক্ষী, কোব্ৰা, কেন্দ্ৰীয় সংৰক্ষিত আৰক্ষী বাহিনী, অসম ৰাইফলছ আৰু দ্ৰুত প্ৰতিক্ৰিয়া বাহিনীৰ যুটীয়া দলে ৰাষ্ট্ৰীয় ঘাইপথ-২ৰ পূব দিশৰ এছ পি পথৰ সমীপৰ অঞ্চলৰ পৰা মৃতদেহ দুটা উদ্ধাৰ কৰে।

জিলা আৰক্ষী অধীক্ষকে মৃতদেহ দুটা কাঙপকপি জিলা চিকিৎসালয়লৈ লৈ যোৱাৰ সময়ত ক্ষুব্ধ স্থানীয় ৰাইজে প্ৰতিবাদ সাব্যস্ত কৰে। পৰিস্থিতি অধিক উত্তপ্ত হোৱাত মৃতদেহ দুটা আৰক্ষী অধীক্ষকৰ কাৰ্যালয়লৈ স্থানান্তৰ কৰা হয়।

প্ৰতিবাদকাৰীসকলক ছত্ৰভংগ দিয়াৰ বাবে নিৰাপত্তাৰক্ষীয়ে কেইবাটাও কন্দুৱা গেছৰ গোলা নিক্ষেপ কৰে। আনহাতে, প্ৰতিবাদকাৰীসকলে ৰাষ্ট্ৰীয় ঘাইপথ-২ অৱৰোধ কৰাত অঞ্চলটোত যান-বাহনৰ চলাচল ব্যাহত হয়।

ইফালে, জনজাতীয় ঐক্য সমিতিৰ আহ্বানত কাঙপকপি জিলাৰ দোকান-পোহাৰ, ব্যৱসায়িক প্ৰতিষ্ঠান আৰু ব্যক্তিগত শিক্ষানুষ্ঠানসমূহ বন্ধ থাকে। সমিতিখনে ৰাজ্য চৰকাৰে তেওঁলোকৰ পাঁচটা দাবী পূৰণ নকৰালৈকে মৃতদেহ দুটা গ্ৰহণ নকৰাৰ সিদ্ধান্ত ঘোষণা কৰে।

উল্লেখ্য যে সমিতিখনে শনিবাৰে বন্ধৰ কাৰ্যসূচী আৰু ২৪ ঘণ্টাৰ বাবে বৃদ্ধি কৰিছিল। তেওঁলোকৰ আশা আছিল যে মণিপুৰৰ উপ-মুখ্যমন্ত্ৰী লোছি ডিখোৱে ছেনাপতি জিলাৰ লোকসকলৰ সৈতে আলোচনা কৰি অপহৃত যুৱক দুজনৰ নিৰাপদ মুক্তিৰ ব্যৱস্থা কৰিব।

সমিতিৰ মুখপাত্ৰ এন জি লুন কিপগেনে সংবাদ মাধ্যমক জনায় যে উপ-মুখ্যমন্ত্ৰীয়ে হস্তক্ষেপ কৰি যুৱক দুজনক সুকলমে ঘূৰাই অনাৰ আশা কৰিয়েই বন্ধৰ সময় বৃদ্ধি কৰা হৈছিল। কিন্তু দুৰ্ভাগ্যজনকভাৱে দেওবাৰে পুৱা তেওঁলোকৰ মৃতদেহ উদ্ধাৰ হয়। চৰকাৰে সকলো দাবী পূৰণ নকৰালৈকে পাউগিনলাল হাংছিং আৰু টিংগিনলুন চংলোইৰ মৃতদেহ গ্ৰহণ নকৰাৰ সিদ্ধান্ত লোৱা হৈছে বুলিও তেওঁ কয়।

সমিতিখনৰ পাঁচটা দাবীৰ ভিতৰত আছে—যুৱক দুজনক উদ্ধাৰ কৰাত ব্যৰ্থ হোৱাৰ অভিযোগত উপ-মুখ্যমন্ত্ৰী লোছি ডিখোক তাৎক্ষণিকভাৱে অপসাৰণ, টাফৌ কুকি গাঁওখনক ছেনাপতি আৰক্ষীৰ অধীনৰ পৰা কাঙপকপি আৰক্ষীৰ অধীনলৈ স্থানান্তৰ, ছেনাপতি জিলাৰ ওকলং শিবিৰৰ পৰা এনএছচিএন-আইএমৰ হুথ্ৰং ব্ৰিগেডক আঁতৰোৱা, গোচৰটো ৰাষ্ট্ৰীয় অনুসন্ধান সংস্থাৰ হাতত অৰ্পণ আৰু অপহৰণ তথা হত্যাকাণ্ডত জড়িত থকাৰ অভিযোগত অভিযুক্তসকলক গ্ৰেপ্তাৰ।

ইয়াৰ উপৰি কুকি-জো সম্প্ৰদায়ৰ প্ৰতি চৰকাৰে বৈষম্যমূলক আচৰণ কৰাৰ অভিযোগ উত্থাপন কৰি তদন্তৰ ক্ষেত্ৰত সমান ব্যৱহাৰ আৰু ন্যায়ৰ দাবী জনাইছে সমিতিখনে।

সমিতিখনৰ এই ঘোষণাৰ পিছত জিলাখনৰ কিছু অঞ্চলত সাময়িকভাৱে উত্তেজনা হ্ৰাস পায় যদিও প্ৰতিবাদ আৰু দোষীৰ বিৰুদ্ধে ব্যৱস্থা গ্ৰহণৰ দাবী অব্যাহত আছে।

উত্তৰ-পূব বিভাগৰ অধিক সংবাদ