উত্তৰ-পূব

মণিপুৰত বৃহৎ অস্ত্ৰ-শস্ত্ৰৰ ভাণ্ডাৰ উদ্ধাৰ, ১০ ফুট দৈৰ্ঘ্যৰ ৰকেট জব্দ

চূড়াচান্দপুৰত সেনা আৰু আৰক্ষীৰ যুটীয়া অভিযানত চীনত নিৰ্মিত মৰ্টাৰ, বিস্ফোৰকসহ বহু সামগ্ৰী উদ্ধাৰ

অসম জাতিৰ খবৰ, চূড়াচান্দপুৰ, ১২ নৱেম্বৰঃ

মণিপুৰৰ চূড়াচান্দপুৰ জিলাত নিৰাপত্তা বাহিনীয়ে বৃহৎ পৰিমাণৰ অস্ত্ৰ-শস্ত্ৰ আৰু বিস্ফোৰক সামগ্ৰী উদ্ধাৰ কৰিছে। উদ্ধাৰ হোৱা সামগ্ৰীসমূহৰ ভিতৰত প্ৰায় ১০ ফুট দীঘল আৰু ৮০ কিলোগ্ৰাম ওজনৰ এটা ৰকেট, চীনত নিৰ্মিত চাৰিটা মৰ্টাৰ আৰু ছটা ঘৰতে প্ৰস্তুত কৰা বিস্ফোৰক যন্ত্ৰ আছে।

আৰক্ষীৰ তথ্য অনুসৰি, ১১ নৱেম্বৰত কাংভাই মহকুমাৰ অন্তৰ্গত পি গেলজাং গাঁৱৰ সমীপৰ বনাঞ্চলত জিলা আৰক্ষী আৰু ভাৰতীয় সেনাই যুটীয়াভাৱে অভিযান চলাই এই সামগ্ৰীসমূহ উদ্ধাৰ কৰে। গোপন সূত্ৰৰ পৰা লাভ কৰা তথ্যৰ ভিত্তিত অভিযানটো চলোৱা হৈছিল।

উদ্ধাৰ হোৱা সামগ্ৰীসমূহৰ ভিতৰত চীনত নিৰ্মিত ৮২ মিলিমিটাৰ জোখৰ চাৰিটা মৰ্টাৰ, পাঁচটা চীনা গ্ৰেনেড, এটা চিএমজি, এটা পিষ্টল আৰু দুটা একনলীয়া বন্দুকো আছে। ইয়াৰ উপৰি ৮২ আৰু ৫১ মিলিমিটাৰ জোখৰ বিভিন্ন ধৰণৰ ৩০টা মৰ্টাৰ বোমা আৰু ৫.৬ মিলিমিটাৰ জোখৰ পাঁচজাঁই গুলী উদ্ধাৰ কৰা হৈছে।

উল্লেখযোগ্য যে, ২০২৩ চনৰ মে’ মাহৰ পৰা মণিপুৰত মেইতেই আৰু কুকি জনগোষ্ঠীৰ মাজত জাতিগত সংঘাত অব্যাহত আছে। এই সংঘাতত কমেও ৩০৬জন লোকৰ মৃত্যু হোৱাৰ লগতে ৪৯জন লোক সন্ধানহীন হৈ আছে আৰু হাজাৰ হাজাৰ লোক গৃহহীন হৈছে। শেহতীয়া সময়ছোৱাত কুকি আৰু নগা জনগোষ্ঠীৰ মাজতো সংঘৰ্ষৰ ঘটনা সংঘটিত হোৱাৰ খবৰ পোৱা গৈছে।

উত্তৰ-পূব বিভাগৰ অধিক সংবাদ