উত্তৰ-পূব

ছিয়াং প্ৰকল্পবিৰোধী প্ৰতিবাদত আৰক্ষীৰ অভিযানৰ ন্যায়িক তদন্তৰ দাবী

অৰুণাচলৰ আদি জনগোষ্ঠীয় সংগঠনৰ চৰকাৰক ১৪ দিনৰ সময়সীমা; দাবী পূৰণ নহ’লে গণতান্ত্ৰিক আন্দোলনৰ সকীয়নি

অসম জাতিৰ খবৰ, পাছিঘাট, ১২ নৱেম্বৰঃ

অৰুণাচল প্ৰদেশৰ প্ৰস্তাৱিত ছিয়াং উচ্চ বহুমুখী প্ৰকল্পৰ বিৰোধিতাৰে যোৱা ২৩ অক্টোবৰত পাছিঘাটত অনুষ্ঠিত প্ৰতিবাদী কাৰ্যসূচীৰ সময়ত আৰক্ষীৰ পদক্ষেপৰ ন্যায়িক তদন্তৰ দাবী জনাইছে আদি জনগোষ্ঠীক প্ৰতিনিধিত্ব কৰা পাছিঘাটভিত্তিক সংগঠন ‘আদি বানে কেবাং ইউনাইটেড’-এ। সংগঠনটোৱে এজন কৰ্মৰত ন্যায়াধীশৰ জৰিয়তে তদন্ত কৰোৱাৰ লগতে ঘটনাৰ সময়ত কৰ্তব্যৰত আৰক্ষী আৰু দণ্ডাধীশৰ বিৰুদ্ধে কঠোৰ ব্যৱস্থা গ্ৰহণৰ দাবী জনাই ৰাজ্যপাল কে টি পাৰনাইকলৈ স্মাৰক-পত্ৰ প্ৰেৰণ কৰিছে।

সংগঠনটোৰ অভিযোগ অনুসৰি, ২৩ অক্টোবৰৰ দিনা দুপৰীয়া প্ৰায় ২ বজাত ৰাণেঘাট তিনিআলিত ২৪ ঘণ্টীয়া অৱস্থান ধৰ্মঘট সম্পূৰ্ণ কৰি শান্তিপূৰ্ণভাৱে বহি থকা যুৱক-যুৱতীৰ ওপৰত নিৰাপত্তাৰক্ষীয়ে কন্দুৱা গেছ আৰু শব্দসৃষ্টিকাৰী গ্ৰেনেড ব্যৱহাৰ কৰিছিল। ইয়াৰ ফলত কেইবাজনো যুৱক-যুৱতী আহত হয় আৰু তেওঁলোকক পাছিঘাটৰ বাকিন পাৰ্টিন সাধাৰণ চিকিৎসালয়লৈ নিয়া হয় বুলি সংগঠনটোৱে দাবী কৰিছে।

সংগঠনটোৱে লগতে স্পষ্ট কৰে যে প্ৰতিবাদী যুৱক-যুৱতীসকল পূব ছিয়াং, ছিয়াং আৰু উচ্চ ছিয়াং জিলাত ৰাষ্ট্ৰীয় জলবিদ্যুৎ নিগমৰ প্ৰস্তাৱিত প্ৰকল্পৰ প্ৰাৰম্ভিক সম্ভাৱ্যতা প্ৰতিবেদনৰ বিৰুদ্ধে আহ্বান জনোৱা বন্ধ কাৰ্যসূচীৰ সৈতে জড়িত নাছিল। স্মাৰক-পত্ৰত উল্লেখ কৰা অনুসৰি, পূব ছিয়াঙত সম্ভাৱ্য হিংসাত্মক পৰিস্থিতিৰ আশংকাত এদিন পূৰ্বেই বন্ধ প্ৰত্যাহাৰ কৰা হৈছিল। আনহাতে, ছিয়াং আৰু উচ্চ ছিয়াং জিলাত বন্ধ কাৰ্যসূচী বিয়লি ৫ বজাত শান্তিপূৰ্ণভাৱে সমাপ্ত হৈছিল।

আদি বানে কেবাং ইউনাইটেডৰ মতে, ৰাণেঘাট তিনিআলিত থকা যুৱক-যুৱতীসকলে ঘৰলৈ উভতি যোৱাৰ সময়তে নিৰাপত্তাৰক্ষীয়ে হস্তক্ষেপ কৰিছিল। সংগঠনটোৱে এই পদক্ষেপক অযুক্তিকৰ আৰু অপ্ৰৰোচিত বুলি অভিহিত কৰিছে। অৱশ্যে পাছিঘাটত ইয়াৰ পিছত সংঘটিত লণ্ডভণ্ডৰ ঘটনাকো সংগঠনটোৱে গৰিহণা দিছে। সেই ঘটনাত উত্তেজিত যুৱকৰ এটা দলে ৰাষ্ট্ৰীয় জলবিদ্যুৎ নিগমৰ কাৰ্যালয়, এটা আৰক্ষী থানা আৰু দুজন বিধায়কৰ বাসগৃহত ক্ষতিসাধন কৰাৰ অভিযোগ উত্থাপন হৈছিল।

সংগঠনটোৱে দাবী কৰিছে যে আৰক্ষীৰ পদক্ষেপৰ ফলত সৃষ্টি হোৱা আতংক আৰু ক্ষোভেই পৰৱৰ্তী হিংসাত্মক পৰিস্থিতিৰ অন্যতম কাৰণ। ঘটনাৰ সমৰ্থনত ভিডিঅ’ আৰু সামাজিক মাধ্যমত প্ৰচাৰিত ভাবুকিপূৰ্ণ ধ্বনি বাৰ্তাও ৰাজ্যপালৰ কাৰ্যালয়ত দাখিল কৰা বুলি সংগঠনটোৱে জানিবলৈ দিছে।

উল্লেখযোগ্য যে, প্ৰস্তাৱিত ১১,২০০ মেগাৱাট ক্ষমতাসম্পন্ন ছিয়াং উচ্চ বহুমুখী প্ৰকল্পটো ছিয়াং নদীৰ ওপৰত নিৰ্মাণৰ পৰিকল্পনা কৰা হৈছে। ৰাজ্য চৰকাৰে জল সুৰক্ষা, বান নিয়ন্ত্ৰণ আৰু বিদ্যুৎ উৎপাদনক প্ৰকল্পটোৰ মূল উদ্দেশ্য হিচাপে উল্লেখ কৰিছে। কিন্তু প্ৰকল্পটোৰ ফলত আদিবাসী গাঁও পানীৰ তলত যোৱাৰ আশংকা, স্থানীয় লোকৰ স্থানচ্যুতি আৰু পৰিৱেশৰ ওপৰত সম্ভাৱ্য প্ৰভাৱক লৈ আদি জনগোষ্ঠীৰ একাংশই দীৰ্ঘদিন ধৰি বিৰোধিতা কৰি আহিছে।

সংগঠনটোৱে চৰকাৰক দাবীসমূহ পূৰণৰ বাবে ১৪ দিনৰ সময়সীমা বান্ধি দিছে। এই সময়ৰ ভিতৰত ব্যৱস্থা গ্ৰহণ নকৰিলে গণতান্ত্ৰিক আন্দোলন গঢ়ি তোলাৰ সকীয়নি প্ৰদান কৰিছে।

উত্তৰ-পূব বিভাগৰ অধিক সংবাদ