ৰাষ্ট্ৰীয়

অমিত শ্বাহৰ ভিডিঅ’ সম্পাদনা কৰি প্ৰচাৰ কৰাৰ অভিযোগ, ৰাহুল গান্ধীক প্ৰহ্লাদ যোশীৰ প্ৰত্যুত্তৰ

ভোটাৰ তালিকাৰ বিশেষ নিবিড় সংশোধনক লৈ চলা বিতৰ্কত দুটা ভিডিঅ’ ক্লিপ শ্বেয়াৰ কৰিছিল ৰাহুলে।

অসম জাতিৰ খবৰ, ৭ নৱেম্বৰঃ

ভোটাৰ তালিকাৰ বিশেষ নিবিড় সংশোধন (এছ আই আৰ)ক লৈ চলি থকা ৰাজনৈতিক বিতৰ্কৰ মাজতে কংগ্ৰেছ নেতা তথা লোকসভাৰ বিৰোধী দলপতি ৰাহুল গান্ধীক সমালোচনা কৰিছে কেন্দ্ৰীয় মন্ত্ৰী প্ৰহ্লাদ যোশীয়ে। ৰাহুল গান্ধীয়ে কেন্দ্ৰীয় গৃহমন্ত্ৰী অমিত শ্বাহৰ দুটা ভিডিঅ’ ক্লিপ সামাজিক মাধ্যমত প্ৰকাশ কৰাৰ পিছতে মন্ত্ৰীগৰাকীয়ে ভিডিঅ’সমূহ সম্পাদনা কৰি প্ৰসংগৰ বাহিৰত প্ৰচাৰ কৰা বুলি অভিযোগ কৰে।

ৰাহুল গান্ধীয়ে নিজৰ ‘এক্স’ একাউণ্টত প্ৰকাশ কৰা ভিডিঅ’ দুটাৰ এটা যোৱা বছৰৰ ৫ ডিচেম্বৰৰ আৰু আনটো বৃহস্পতিবাৰৰ। প্ৰথমটো ক্লিপত অমিত শ্বাহে সংসদত এছ আই আৰ সন্দৰ্ভত আলোচনা কৰিব নোৱাৰি বুলি মন্তব্য কৰা দেখা যায়। আনটো ক্লিপত তেওঁ এছ আই আৰ বিষয়ত আলোচনাৰ বাবে সংসদৰ বিশেষ অধিৱেশন আহ্বান কৰাৰ প্ৰস্তুতিৰ কথা উল্লেখ কৰে।

এই দুটা বক্তব্যৰ মাজত পাৰ্থক্য দেখুৱাই ৰাহুল গান্ধীয়ে শাসকীয় পক্ষৰ স্থিতিক লৈ প্ৰশ্ন উত্থাপন কৰে। ভিডিঅ’ দুটা শ্বেয়াৰ কৰি তেওঁ কটাক্ষ কৰে যে শাসকীয় পক্ষ যেন বিভ্ৰান্তিত পৰিছে।

ইয়াৰ প্ৰত্যুত্তৰত কেন্দ্ৰীয় মন্ত্ৰী প্ৰহ্লাদ যোশীয়ে অভিযোগ কৰে যে ৰাহুল গান্ধীয়ে অমিত শ্বাহৰ বক্তব্যৰ সম্পাদিত আৰু প্ৰসংগৰ বাহিৰৰ ভিডিঅ’ প্ৰচাৰ কৰিছে। এছ আই আৰ বিষয়টো সন্দৰ্ভত পৰ্যাপ্ত তথ্য নজনাকৈ ৰাহুলে এনে ভিডিঅ’ শ্বেয়াৰ কৰা বুলি তেওঁ সমালোচনা কৰে।

উল্লেখ্য যে ভোটাৰ তালিকাৰ বিশেষ নিবিড় সংশোধনক লৈ কংগ্ৰেছ আৰু বিজেপিৰ মাজত বিগত কিছুদিন ধৰি ৰাজনৈতিক বাকযুদ্ধ অব্যাহত আছে।

ৰাষ্ট্ৰীয় বিভাগৰ অধিক সংবাদ