🔴 ব্ৰেকিং নিউজ
প্ৰথম পৃষ্ঠা › ক্ৰীড়া › কাজাখস্তানৰ টেনিছ নীতি সফল বিনিয়োগ, ৰাইবাকিনাৰ...
ক্ৰীড়া

কাজাখস্তানৰ টেনিছ নীতি সফল বিনিয়োগ, ৰাইবাকিনাৰ সাফল্যই অনুপ্ৰাণিত কৰিছে নতুন প্ৰজন্মক

বিদেশত জন্মগ্ৰহণ কৰা খেলুৱৈক সমৰ্থন জনোৱাৰ সিদ্ধান্তক আদৰণি জিবেক কুলামবায়েভাৰ।

কাজাখস্তানৰ টেনিছ নীতি সফল বিনিয়োগ, ৰাইবাকিনাৰ সাফল্যই অনুপ্ৰাণিত কৰিছে নতুন প্ৰজন্মক

অসম জাতিৰ খবৰ, ক্ৰীড়া ডেস্ক, ৬ নৱেম্বৰঃ

টেনিছৰ বিশ্বমঞ্চত নিজৰ স্থান শক্তিশালী কৰাৰ লক্ষ্যৰে কাজাখস্তানে গ্ৰহণ কৰা এক বিশেষ নীতিক সফল বিনিয়োগ আখ্যা দিছে দেশখনৰ টেনিছ খেলুৱৈ জিবেক কুলামবায়েভাই। বিদেশত জন্মগ্ৰহণ কৰা এলেনা ৰাইবাকিনা আৰু আলেকজেণ্ডাৰ বুবলিকৰ দৰে খেলুৱৈক সমৰ্থন জনাই কাজাখস্তানে টেনিছৰ ক্ষেত্ৰত নতুন পৰিচয় গঢ়িবলৈ সক্ষম হৈছে বুলি তেওঁ মন্তব্য কৰে।

উল্লেখ্য যে, ৰাছিয়াত জন্মগ্ৰহণ কৰা এলেনা ৰাইবাকিনাই ২০১৮ চনত কাজাখস্তানক প্ৰতিনিধিত্ব কৰিবলৈ আৰম্ভ কৰিছিল। আনহাতে, ৰাছিয়াত জন্মগ্ৰহণ কৰা আলেকজেণ্ডাৰ বুবলিকে ২০১৬ চনৰ পৰা কাজাখস্তানৰ হৈ খেলি আহিছে।

ৰাইবাকিনাই ছেপ্টেম্বৰ মাহত বিশ্বৰ এক নম্বৰ টেনিছ খেলুৱৈৰ স্থান লাভ কৰি কাজাখস্তানৰ হৈ এই কৃতিত্ব অৰ্জন কৰা প্ৰথমগৰাকী খেলুৱৈ হিচাপে পৰিগণিত হয়। ২০২৬ চনৰ ইউ এছ অ’পেন খিতাপ জয়ো তেওঁৰ কেৰিয়াৰৰ অন্যতম উল্লেখযোগ্য সফলতা।

পি টি আইৰ সৈতে হোৱা এক সাক্ষাৎকাৰত কুলামবায়েভাই কয় যে এই খেলুৱৈসকলৰ সাফল্যই বিশেষকৈ দেশখনৰ শিশুসকলক টেনিছৰ প্ৰতি অধিক আকৰ্ষিত কৰিছে। কাজাখস্তানৰ টেনিছ ক’ৰ্টসমূহ এতিয়া শিশুৰে ভৰি থাকে বুলিও তেওঁ উল্লেখ কৰে।

বিদেশত জন্মগ্ৰহণ কৰা খেলুৱৈক দেশখনৰ হৈ খেলাৰ সুযোগ দিয়াৰ নীতিক সমৰ্থন কৰি তেওঁ কয় যে কাজাখস্তানত টেনিছ ফেডাৰেচন গঢ়ি তোলাৰ প্ৰাৰম্ভিক সময়ত এনে পদক্ষেপৰ প্ৰয়োজন আছিল। সেই সময়ত দেশখনত শীৰ্ষ পৰ্যায়ৰ টেনিছ খেলুৱৈৰ সংখ্যা কম আছিল। সেয়েহে আন্তঃৰাষ্ট্ৰীয় পৰ্যায়ত টেনিছৰ পৰিচিতি বৃদ্ধি কৰাত এই সিদ্ধান্তই সহায় কৰিছিল।

ইফালে, ভাৰতত অনুষ্ঠিত বিভিন্ন টেনিছ প্ৰতিযোগিতাত নিয়মীয়াকৈ অংশগ্ৰহণ কৰি অহা কুলামবায়েভাই ভাৰতৰ পৰিৱেশ, খাদ্য আৰু মানুহৰ প্ৰতি সন্তুষ্টি প্ৰকাশ কৰে। তেওঁৰ মতে, ভাৰতৰ বিভিন্ন চহৰৰ পৰিৱেশ আৰু খেলৰ পৰিস্থিতি পৃথক হোৱাৰ বাবে প্ৰতিবাৰেই নতুন অভিজ্ঞতা লাভ কৰে।

চেন্নাই অ’পেনত অংশগ্ৰহণৰ সময়ত জাপানৰ মেই য়ামাগুচিৰ বিৰুদ্ধে দুবাৰকৈ খেলাৰ এক ব্যতিক্ৰমী অভিজ্ঞতাও লাভ কৰে তেওঁ। কোৱালিফায়িং আৰু মূল প্ৰতিযোগিতা—দুয়োখন মেচতে য়ামাগুচিক পৰাস্ত কৰিবলৈ সক্ষম হয় কুলামবায়েভা। অৱশ্যে পিছত দ্বিতীয় ৰাউণ্ডত জাপানৰ মাই হণ্টামাৰ হাতত ৬-৪, ৪-৬, ৫-৭ ব্যৱধানত পৰাস্ত হৈ প্ৰতিযোগিতাৰ পৰা বিদায় লয়।

নিজৰ টেনিছ যাত্ৰা সন্দৰ্ভত কুলামবায়েভাই কয় যে সপোন পূৰণ কৰিবলৈ কঠোৰ পৰিশ্ৰমৰ বিকল্প নাই। প্ৰতিটো সফলতাৰ বাবে ধৈৰ্য, অধ্যৱসায় আৰু নিয়মীয়া অনুশীলনৰ প্ৰয়োজন।

তেওঁ বৰ্তমান ডাবলছত বিশ্বৰ ৯৫সংখ্যক স্থানত আছে। আনহাতে, ছিংগলছত তেওঁৰ কেৰিয়াৰৰ সৰ্বশ্ৰেষ্ঠ ৰেংকিং হৈছে ২৯২। দুয়োটা শাখাতে খেলি যাবলৈ আগ্ৰহী বুলি উল্লেখ কৰি তেওঁ কয় যে সময়ৰ লগে লগে নিজৰ ৰেংকিং উন্নত কৰাই বৰ্তমানৰ লক্ষ্য।

🗞️ ছপা সংস্কৰণ আৰু ই-বাতৰি
এই বাতৰি আজিৰ সম্পূৰ্ণ ৮ পৃষ্ঠাৰ ডিজিটেল ই-বাতৰিত পঢ়ক

সম্পূৰ্ণ সংবাদপত্ৰৰ ৰূপত আল্ট্ৰা-এইচডি জুম আৰু PDF ডাউনলোড সুবিধা।

এই সংবাদ শ্বেয়াৰ কৰক:
WhatsApp X (Twitter) Facebook

ক্ৰীড়া বিভাগৰ অধিক সংবাদ