উত্তৰ-পূব

ছিয়াং বৃহৎ বান্ধক লৈ ৰাষ্ট্ৰপতিৰ হস্তক্ষেপ বিচাৰিলে ছোনম ৱাংচুকে

অৰুণাচলৰ ১১,২০০ মেগাৱাটৰ প্ৰকল্পক লৈ উদ্বেগ; থলুৱা লোকৰ অধিকাৰ, পৰিৱেশ আৰু প্ৰতিবাদকাৰীৰ নিৰাপত্তাৰ প্ৰশ্ন উত্থাপন।

অসম জাতিৰ খবৰ, ইটানগৰ, ৪ নৱেম্বৰঃ অৰুণাচল প্ৰদেশৰ প্ৰস্তাৱিত ১১,২০০ মেগাৱাট শক্তিসম্পন্ন ছিয়াং আপাৰ মাল্টিপাৰপাছ প্ৰকল্পক লৈ সৃষ্টি হোৱা উত্তেজনাৰ মাজতে ৰাষ্ট্ৰপতি দ্ৰৌপদী মুৰ্মুৰ হস্তক্ষেপ বিচাৰিছে লাডাখৰ পৰিৱেশকৰ্মী তথা উদ্ভাৱক ছোনম ৱাংচুকে। ৩ নৱেম্বৰত ৰাষ্ট্ৰপতিলৈ প্ৰেৰণ কৰা এখন পত্ৰত তেওঁ থলুৱা জনগোষ্ঠীৰ অধিকাৰ, পৰিৱেশৰ ক্ষতি আৰু প্ৰতিবাদৰ সময়ত প্ৰশাসনৰ ভূমিকা সন্দৰ্ভত উদ্বেগ প্ৰকাশ কৰে।

ৱাংচুকে অভিযোগ কৰে যে প্ৰস্তাৱিত বৃহৎ বান্ধৰ বিৰোধিতা কৰা গাঁওবাসীয়ে ভীতি প্ৰদৰ্শনৰ সন্মুখীন হৈছে আৰু অঞ্চলটোত বৃহৎ সংখ্যক নিৰাপত্তাৰক্ষী মোতায়েন কৰা হৈছে। যুৱ কৰ্মীৰ গ্ৰেপ্তাৰ, যাতায়াতত বাধা আৰু স্থানীয় লোকৰ ওপৰত চাপ প্ৰয়োগৰ অভিযোগো তেওঁ উত্থাপন কৰে। শান্তিপূৰ্ণভাৱে প্ৰকল্পৰ বিৰোধিতা কৰা থলুৱা লোকক ‘দেশবিৰোধী’ আখ্যা দিয়াটো উদ্বেগজনক বুলিও তেওঁ মন্তব্য কৰে।

পত্ৰখনত ৱাংচুকে উল্লেখ কৰে যে ছিয়াং নদী আদী জনগোষ্ঠীৰ সাংস্কৃতিক পৰিচয়, পৰম্পৰা আৰু জীৱিকাৰ সৈতে গভীৰভাৱে জড়িত। প্ৰস্তাৱিত প্ৰকল্পই তেওঁলোকৰ পৈতৃক ভূমি আৰু হিমালয়ৰ পৰিৱেশতন্ত্ৰৰ ওপৰত সুদূৰপ্ৰসাৰী প্ৰভাৱ পেলাব পাৰে বুলি তেওঁ আশংকা প্ৰকাশ কৰে।

তেওঁৰ মতে, এনে স্পৰ্শকাতৰ অঞ্চলত বৃহৎ আন্তঃগাঁথনিমূলক প্ৰকল্প ৰূপায়ণৰ পূৰ্বে স্থানীয় ৰাইজৰ সৈতে গণতান্ত্ৰিক আলোচনা আৰু অৰ্থপূৰ্ণ পৰামৰ্শ গ্ৰহণ কৰাটো অত্যন্ত প্ৰয়োজনীয়। প্ৰকল্প সন্দৰ্ভত কোনো চূড়ান্ত সিদ্ধান্ত লোৱাৰ আগতে চৰকাৰ আৰু ক্ষতিগ্ৰস্ত জনগোষ্ঠীৰ মাজত মুকলি আলোচনাৰ ব্যৱস্থা কৰিবলৈ তেওঁ ৰাষ্ট্ৰপতিক আহ্বান জনায়।

উল্লেখ্য, প্ৰস্তাৱিত ১১,২০০ মেগাৱাটৰ ছিয়াং প্ৰকল্পক লৈ অৰুণাচলৰ আদী জনগোষ্ঠীৰ একাংশই দীৰ্ঘদিন ধৰি প্ৰতিবাদ কৰি আহিছে। সম্ভাৱ্য স্থানচ্যুতি, পৰিৱেশৰ অৱক্ষয়, জীৱবৈচিত্ৰ্যৰ ক্ষতি আৰু পৈতৃক সাংস্কৃতিক ঐতিহ্য বিপন্ন হোৱাৰ আশংকাই এই প্ৰতিবাদৰ মূল কাৰণ।

ইফালে, তিব্বতৰ য়াৰলুং ছাংপো নদীৰ ওপৰৰ অংশত চীনৰ বৃহৎ জলবিদ্যুৎ প্ৰকল্প নিৰ্মাণৰ পৰিকল্পনাৰ পৰিপ্ৰেক্ষিতত ছিয়াং প্ৰকল্পটোৰ কৌশলগত গুৰুত্বও বৃদ্ধি পাইছে। এই নদীখন ভাৰতত প্ৰৱেশ কৰি ছিয়াং আৰু পৰৱৰ্তী সময়ত ব্ৰহ্মপুত্ৰ নামেৰে পৰিচিত হৈছে।

উত্তৰ-পূব বিভাগৰ অধিক সংবাদ