বেংগালুৰুত ধন দাবীৰ বাবে দুই যুৱকক অপহৰণ, গ্ৰেপ্তাৰ ১১

অপহৰণৰ অভিযোগত অভিযুক্ত যুৱতীৰো গ্ৰেপ্তাৰ; উদ্ধাৰ ছফ্টৱেৰ কৰ্মী আৰু তেওঁৰ ৰূমমেট

অসম জাতিৰ খবৰ, ২৯ অক্টোবৰঃ কৰ্ণাটকৰ বেংগালুৰুৰ মাৰাথাহাল্লীত ধন আদায়ৰ উদ্দেশ্যে দুজন যুৱকক অপহৰণ কৰাৰ অভিযোগত এগৰাকী ২১ বছৰীয়া যুৱতীসহ ১১জন লোকক গ্ৰেপ্তাৰ কৰিছে আৰক্ষীয়ে। বুধবাৰে পুৱতি নিশা সংঘটিত এই ঘটনাৰ পিছত আৰক্ষীয়ে অভিযোগ লাভ কৰাৰ ছয় ঘণ্টাৰ ভিতৰতে অপহৃত দুয়োজন যুৱকক উদ্ধাৰ কৰিবলৈ সক্ষম হয়। ঘটনাটোক কেন্দ্ৰ কৰি অঞ্চলটোত চাঞ্চল্যৰ সৃষ্টি হৈছে।

আৰক্ষীৰ তথ্য অনুসৰি, বি মহেন্দ্ৰ নামৰ ২৩ বছৰীয়া ছফ্টৱেৰ কৰ্মীজন আৰু তেওঁৰ ৰূমমেট তৰুণক বুধবাৰে পুৱা ২.৫০ বজাৰ পৰা ৬ বজাৰ ভিতৰত অপহৰণ কৰা হৈছিল। দুয়োজনেই অন্ধ্ৰপ্ৰদেশৰ বাসিন্দা। পুত্ৰক অপহৰণ কৰাৰ অভিযোগ উত্থাপন কৰি মহেন্দ্ৰৰ পিতৃ বি ৰমণাই সেইদিনাই মাৰাথাহাল্লী আৰক্ষীৰ কাষ চাপে আৰু লিখিত অভিযোগ দাখিল কৰে।

অভিযোগ লাভ কৰাৰ পিছতে আৰক্ষীয়ে তদন্ত আৰম্ভ কৰি ঘটনাস্থলীৰ আশে-পাশে থকা অঞ্চলসমূহৰ চিচিটিভি ফুটেজ পৰীক্ষা কৰে। আধুনিক তদন্ত পদ্ধতিৰ সহায়ত সন্দেহযুক্ত লোকসকলৰ সন্ধান উলিয়াই আৰক্ষীয়ে মহেন্দ্ৰ আৰু তৰুণক উদ্ধাৰ কৰে। ইয়াৰ পিছতে অপহৰণৰ ঘটনাৰ সৈতে জড়িত থকাৰ অভিযোগত ১১জন লোকক গ্ৰেপ্তাৰ কৰা হয়।

আৰক্ষীৰ মতে, জেৰাৰ সময়ত অভিযুক্তসকলে ধন আদায়ৰ উদ্দেশ্যে দুয়োজন যুৱকক অপহৰণ কৰাৰ ষড়যন্ত্ৰত একেলগে জড়িত থকাৰ কথা স্বীকাৰ কৰা বুলি অভিযোগ উঠিছে। আনহাতে, অপহৰণৰ ঘটনাত অভিযুক্ত যুৱতীগৰাকীয়ে মহেন্দ্ৰৰ বিৰুদ্ধেও ধৰ্ষণৰ অভিযোগ উত্থাপন কৰিছে। এই অভিযোগৰ পৰিপ্ৰেক্ষিতত দুয়োপক্ষৰ বিৰুদ্ধে আৰক্ষীয়ে ব্যৱস্থা গ্ৰহণ কৰিছে বুলি বাতৰিত প্ৰকাশ পাইছে। ঘটনাটোৰ সকলো দিশ সামৰি আৰক্ষীৰ তদন্ত অব্যাহত আছে।

ৰাষ্ট্ৰীয় বিভাগৰ অধিক সংবাদ

ৰাষ্ট্ৰীয়

উত্তৰাখণ্ডত বদ্ৰীনাথৰ পৰা উভতি অহা হেলিকপ্টাৰ দুৰ্ঘটনাগ্ৰস্ত, ৬জন আৰোহী আছিল

৩০ অক্টোবৰ, ২০২৬

ৰাষ্ট্ৰীয়

ভাৰতৰ সময় নিৰ্ধাৰণৰ স্বনিৰ্ভৰতা বৃদ্ধিৰ লক্ষ্যৰে পাৰমাণৱিক ঘড়ীযুক্ত উপগ্ৰহ উৎক্ষেপণ ইছৰোৰ

৩০ অক্টোবৰ, ২০২৬

ৰাষ্ট্ৰীয়

অ’চিআই মৰ্যাদা বাতিলৰ জাননীৰ ভিত্তি বিচাৰি চৰকাৰলৈ ইমৰান খানৰ প্ৰত্যুত্তৰ

২৯ অক্টোবৰ, ২০২৬